जनकपुरधाम,कार्तिक ११ गते ।  जनकपुरधाम उपमहानगरपालिकाको कपिलेश्वर क्रिकेट टिमको आयोजना तथा जनकपुरधाम उपमहानगरपालिकाको सहयोगमा सम्पन्न वडा स्तरीय टि–२० क्रिकेट प्रतियोगिता २०८० को उपाधि कपिलेश्वर टिमले जितेको छ ।

कूल १६ वटा टिमको सहभागितामा भएको वडा स्तरीय क्रिकेट प्रतियोगिता अन्तर्गत आज भएको फाइनल खेलमा धनुषाको ललिया क्रिकेट टिमलाई कपिलेश्वर टिमले ८ विकेटले पराजित गर्दै उपाधि जितेको हो ।गत वर्षदेखि शुरु भएको वडा स्तरीय क्रिकेट प्रतियोगिताको फाइनल खेलमा टस जितेर ब्याटिङ रोजेको कलिया क्रिकेट टिमले निर्धारित २० ओभरको खेलमा सबै विकेटको क्षतिमा ७३ रन जोड्यो ।७४ रनको लक्ष्य सहित खेल मैदानमा उत्रेका कपिलेश्वर क्रिकेट टिमले २ विकेटको क्षतिमा लक्ष्य भेटाएको थियो ।प्रतियोगितामा विजयी कपिलेश्वर टिमले ३० हजार नगद, शिल्ड, कप र प्रमाणपत्र तथा उपविजेता भएका ललिया क्रिकेट टिमले १५ हजार नगद, शिल्ड, कप तथा प्रमाणपत्र प्राप्त गरे ।

वडा दशै, दीपावली तथा छठ पर्वको अवसर पारेर जनकपुरधाम उपमहानगरपालिकाका–१६ कपिलेश्वरका वडाध्यक्ष रामचन्द्र पञ्जियारको सक्रियतामा वडा स्तरीय टि–२० क्रिकेट प्रतियोगिता गत वर्षदेखि आयोजना हुँदै आएको छ ।विजेता तथा उपविजेता टिमलाई नगद शिल्ड, कप तथा प्रमाणपत्र जनकपुरधाम उपमहानगरपालिकाका नगर प्रमुख मनोज कुमार साह तथा उपप्रमुख किशोरी साहले प्रदान गर्नुभएको थियो ।साभार : रेडियो नेपाल
                                    

2 वर्ष पहिले    458 Post Views