जनकपुरधाम, पुष २१ गते ।सहकारी संस्थाहरूलाई उत्पादनमुखी काममा लाग्नुपर्नेमा एक कार्यक्रममा सहभागीहरुले जोड दिएका छन् । आस्था बचत तथा ऋण सहकारी संस्थाको शनिबार सम्पन्न चौधौं साधारणसभाको उद्घाटन सत्रमा सहभागीहरुले सहकारीको अभियानलाई उत्पादनसँग जोड्न सकेमात्र समृद्ध समाजको निर्माण हुन सक्ने बताए । सहकारी समाज विकास र परिवर्तनको सम्बाहकको रूपमा प्रयोग हुन सक्ने साधन भएकाले त्यसका सञ्चालकहरूले सुझबुझका साथ नीति, विधि र प्रक्रियाभित्र रहेर सहकारीलाई उत्पादनमुखी अस्त्रको रूपमा प्रयोग गर्न आग्रह गरे । कार्यक्रममा अहिलेसम्मका सहकारीका गतिविधिलाई हेर्दा कतिपयले सहकारीलाई ठगी खाने भाडोका रूपमा प्रयोग गरेको बुझिन आएकाले त्यस्ता खालका सहकारीहरूले तत्काल पारदर्शी तरिकाले अघि बढ्न आग्रह गरे । सर्वसाधारण नागरिकले गास कटाएर बचत गरेको धनमाथि खेलबाड गर्ने अधिकार कसैलाई नभएको भन्दै त्यस्ता खालका गतिविधि गर्नेहरूलाई कानुनी दायरामा ल्याउनुपर्नेमा जोड दिएको छ । संस्थाका अध्यक्ष बिनोद कुमार साहको अध्यक्षता भएको सो कार्यक्रममा राष्ट्रिय सहकारी बैंकका अध्यक्ष के पी उप्रेती प्रमुख अतिथि रहेका थिए । संस्थाले आफ्ना असल बचतकर्ता, असल ऋणि, ज्येष्ठ नागरिक बचत कर्ता लगायतलाई सम्मान गरेको थियो । आस्था बचत तथा ऋण सहकारी संस्थामा कुल २२ हजार ३ सय २९ सदस्य रहेको छ भने कुल ९ करोड २२ लाख ५७ हजार ४ सय शेयर पूंजी रहेको छ ।
                                    

1 वर्ष पहिले    140 Post Views