जनकपुरधाम, माघ १३ गते । प्रथम सभामुख क्रिकेट कप–२०८० सुरु भएको छ । मधेश प्रदेशसभाको छैठौं वार्षिकोत्सवको अवसरमा शनिबारदेखि क्रिकेट कप जनकपुरधाममा सुरु भएको हो ।
जनकपुरधाम उपमहानगरपालिका १४ रजौलस्थित रामजानकी बहुउद्देश्य अन्तराष्ट्रिय रंगशालामा शनिबार महोत्तरी र सर्लाही बीच उद्घाटन खेल भएको थियो । पहिलो खेलमा महोत्तरीले सहज जित हात पारेको छ । टस जितेर महोत्तरी टिम ब्याटिङको लागि सर्लाही टिमलाई निम्तिआएका थिए । सर्लाही टिम ३३ ओभर ४ बलमा सबै विकेट गुमाएर एक सय ३७ रनको लक्ष्य महोत्तरी टिम समक्ष प्रस्तुत गरेका थिए । 
सर्लाहीका लागि ब्याटिङ गरेका अली हसनले सार्वधिक ६८ बलमा ३८ र विवेक ठाकुरले २७ बलमा २४ रन बनाए । हसनले टिमको स्कोर उच्च बनाउन बढी समय क्रिचमा रहेर कडा संघर्ष गरेका थिए । सर्लाहीकै लागि ब्याटिङ गरेका आशुतोष यादवले १४ र सुधिर चौधरीले १५ रन बनाए । सर्लाहीका अन्य ब्याटस म्यानले दोहोरो अंकमा रन बनाउन सकेनन् । 
महोत्तरीका लागि बलिङ गरेका नितेश कुमार यादवले पाँच ओभरमा २७ रन खर्चेर तीन विकेट र रवि कुमार सिंहले सात ओभरमा २२ रन खर्चेर दुई विकेट लिए । महोत्तरीकै लागि बलिङ गरेका रमेश कुमार सहनी, विनोद सहनी र निरज कुमार यादवले समान एक÷एक विकेट लिए । 
एक सय ३७ रनको लक्ष्य पञ्छयाएका महोत्तरी टिम २८ ओभर चार बलमा ६ विकेट गुमाएर लक्ष्य पुरा गरे । महोत्तरीका लागि नविन कुमार यादवले सार्वधिक नटआउट ४९ बलमा ४२ रन र सौरभ नागवंशीले ४१ बलमा ३० रनको योगदान दिए । नविन महोत्तरीका लागि उत्कृष्ट ब्याटिङ गरेका थिए ।
सर्लाहीका लागि बलिङ गरेका नवल किसोर राम र निरज यादवले दुई÷दुई विकेट लिए । विवेक चौधीरी र अली हसनले पनि एक÷एक विकेट लिए । यस खेलको म्यान अफ दी म्याच महोत्तरीका नविन कुमार यादव घोषित भएका थिए । आइतबार पर्सा र सिरहाबीच खेल हुने आयोजक संस्थाले जनाएको छ । कप नकआउट प्रणालीमा भइरहेको छ । आइसीसीको मान्यता अनुसार भइरहेको कप अन्तरगत प्रत्येक खेल ४० ओभरको गराउने तयारी छ ।
                                    

11 महीना पहिले    139 Post Views