जनकपुरधाम,  जेठ ४ गते ।  जानकी नवमीको अवसरमा आज जनकपुरधाममा विशेष धार्मिक मेला लागेको छ ।
प्रत्येक वर्ष वैशाख शुक्लपक्ष नवमी तिथिका दिन जगत जननी माता जानकी मानव कल्याणका लागि तत्कालीन मिथिलाका राजा जनकको पुत्रिका रुपमा आजैका दिन पृथ्वीबाट अवतरित भएको धार्मिक विश्वासका साथ जनकपुरधाम सहित देशभरिका मठ मन्दिरहरूमा विभिन्न धार्मिक अनुष्ठान सहित जानकी नवमी पर्व मनाउने चलन रहेको छ ।
आज जनकपुरधामको ऐतिहासिक तथा धार्मिक महत्वको गंगासागर धनुषसागर, विहारकुण्ड, रत्नसागर जस्ता पोखरी एवं तलाउ तथा धार्मिक महत्वको दुग्धमति नदिमा स्नान गरेर जानकी मन्दिर सहितका अन्य मठमन्दिरहरूमा विशेष पूजापाठ गरिरहेका छन् ।
जानकी जन्म महामहोत्सवको अवसर पारेर जानकी मन्दिरमा ९ दिवसीय विविध धार्मिक अनुष्ठानको आयोजना गरिइएको छ । आज बिहान जनकपुरधामको प्रसिद्ध धार्मिक महत्वको नदी दुग्धमतिको बसविट्टी घाटमा शाही स्नान स्नान सम्पन्न भएको छ ।
शाही स्नानमा जानकी मन्दिरका महन्थ रामतपेश्वर दास वैष्णव, रामरोशन दास वैष्णवले जनकपुरधामका साधुसन्तहरुका अतिरिक्त भारतका वृन्दावन, चित्रकुट, अयोध्या तथा बनारसबाट साधुसन्तहरु सहभागी हुनु भएको छ । ।
जानकी जन्म महोत्सवको अवसरमा जानकी मन्दिर परिसरमा बधाई गान, मंगलगान, सन्ध्या आरती, भजन तथा राम कथा आयोजना हुँदै आएको जानकी नवमीको धार्मिक अनुष्ठानमा भाग लिनका लागि स्वदेशी तथा भारतीय तीर्थयात्रीहरू ठूलो सङ्ख्यामा सहभागी हुनु भएको छ ।
त्रेतायुगमा तत्कालीन मिथिलाका राजा जनकले राज्यमा अनिकाल परेको वेलामा देवी देउताहरूको सल्लाहमा आफैले हलो चलाउँदा माता जानकी धर्तीबाट प्रकट भएको बाल्मिकीरामायणमा उल्लेख रहेको छ । जानकी जन्म महोत्सवको अवसर पारेर जानकी मन्दिरलाई विशेष रुपमा सजाउने काम भएको छ ।
उता मधेश प्रदेश सरकारले जानकी नवमीको अवसर पारेर मधेश प्रदेश भरि आज सार्वजनिक बिदा दिएको छ ।
साभार : रेडियो नेपाल
                                    

1 वर्ष पहिले    307 Post Views