जनकपुरधाम, जेठ ४ गते । मधेश प्रदेशमा यसवर्ष औषत भन्दा बढी वर्षा हुने भएपछि मधेश प्रदेश सरकार मनसुन पूर्वतयारी तथा प्रतिकार्य योजनाको निर्माण सहितको तयारीमा जुटेको छ । 
मधेश प्रदेश सरकारको गृह, सञ्चार तथा कानून मन्त्रालयको आयोजनामा आज जनकपुरधाममा सम्पन्न भएको पूर्व तयारी बैठक तथा सम्भावित जोखिम र त्यसपछिको उद्धार एवं राहतको विषयमा सरोकारवालाहरूको सहभागितामा आज जनकपुरधाममा बृहत् बैठकमा सम्पन्न भएको छ ।   
मधेश प्रदेशका मुख्यमन्त्री सतिश कुमार सिंहको सहभागितामा भएको सो बैठकमा मधेश प्रदेश सरकारका उच्च अधिकारीहरू सबै सुरक्षा निकायका प्रदेश स्तरका प्रमुखहरूको सहभागितामा भएको बृहत् बैठकमा यस पटक अधिक वर्षा हुने जल तथा मौसम विज्ञान विभागले पूर्वानुमान गरेकाले प्रदेशमा अत्यधिक वर्षाले आउने बाढी तथा डुबानबाट प्रदेशवासीलाई कसरी जोगाउने विषयमा छलफल भएको छ । 
हेविट्याटको सहयोगमा सम्पन्न भएको बैठकमा बोल्दै मधेश प्रदेशका मुख्यमन्त्री सतिश कुमार सिंहले मधेश प्रदेश सरकारसँग साधन श्रोत पनि रहेकाले प्रदेशमा प्राकृतिक विपत्तिमा परेका नागरिकहरूलाई समयमा उद्धार तथा राहत दिन चाहेपनि संघीय कानुनमा भएको प्रावधानका कारणले शीघ्र रुपमा गर्न नसकेको बताउनु भयो । 
उहाँले यस्ता कानुनहरूमा भएको व्यवधानलाई फुकाएर प्राकृतिक विपत्तिको समयमा काम गर्नका लागि अवसर प्रदान गर्नका लागि संघीय सरकारसँग माग पनि गर्नु भयो । मुख्यमन्त्री सिंहले अहिले विभिन्न खोलामा बनेको पुलहरू बालुवा गिट्टीका कारणले पुरिने अवस्थामा पुगेको र ती पुलहरूलाई सुरक्षित गर्नका लागि प्रदेश सरकारले काम गर्न खोज्दा गर्न नपाउने कानूनी व्यवस्था भएको बताउनु भयो । 
उहाँले प्रदेश सरकारले प्राकृतिक विपत्तिमा परेको १ लाख परिवारलाई लक्षित गरेर बिमा गरिदिने गरि बजेटमा कार्यक्रम ल्याएको बताउँदै प्राकृतिक विपत्तिको समयमा काम गर्नका विद्यालय तहमा नै स्वयं सेवक सम्बन्धि प्रशिक्षण दिन आवश्यक भएको बताउनु भयो । 
जनकपुरधाम उपमहानगरपालिकाका नगरप्रमुख मनोज कुमार साहले प्राकृतिक विपत्तिबाट जोगिनका लागि जनकपुरधाम उपमहानगरपालिकाले ढलको नियमित सरसफाई तथा नगर बाहिर रहेको दुई खोलामा तटबन्ध निर्माण गर्ने पक्षमा लागेको बताउनु भयो ।
साभार : रेडियो नेपाल
                                    

10 महीना पहिले    154 Post Views