जनकपुरधाम,मंसिर १८ गते । सीताराम विवाह पञ्चमीका लागि श्रीराम जन्मभूमि भारतको अयोध्याबाट हिँडेको जन्ती आज जनकपुरधाम आउने भएको छ ।
करिब पाँच सयको संख्यामा साधुसन्त र अयोध्यावासी भगवान् श्रीरामको जन्तीको रूपमा जनकपुरधाम आउन लागेका हुन् । जन्ती सोमवार राति महोत्तरीको मटिहानी आइपुग्दा भव्य स्वागत गरिएको छ ।
मटिहानीका नगर प्रमुख हरि प्रसाद मण्डल र नगरवासीले बाजागाजाका साथ आतिशबाजी गरेर जन्तीको भव्य स्वागत गरे । सोमवार राति मटिहानीमै बसेका जन्ती आज जनकपुरधाम आइपुग्ने जानकी मन्दिरका छोटा महन्त रामरोषण दास ‘वैष्णव’ले जानकारी दिए ।
उनले जन्तीको स्वागत गर्न नगरवासीसँग अपिल गरेका छन् । उनले भने, ‘प्रत्येक पाँच वर्षको अन्तरालमा अयोध्याबाट भगवान् श्रीरामको जन्ती आउँछ । यो हाम्रो सौभाग्य हो । जन्तीलाई हामीले भव्य स्वागत गर्नुपर्छ ।’ उनले चार दिनसम्म जनकपुरधाममा रहने जन्तीको बास र खानासहित सबै व्यवस्था मिलाएको बताए ।
जानकी मन्दिरमा सीताराम विवाह पञ्चमी जारी छ । पहिलो दिन आइतबार नगर दर्शन मनाइयो । सोमवार फूलबारी लीला गरियो । त्रेतायुगमा भगवान् श्रीराम भाइ लक्ष्मणसँग जनकपुरधामको बगैँचामा पुगेपछि सीताको आमनेसामने भएको कथा वर्णित छ ।
आज रंगभूमि मैदानमा धनुषयज्ञ हुनेछ । कसैले हल्लाउन पनि नसकेको शिव धनुष भगवान् श्रीरामले तीन टुक्रा पारेपछि माता सीतासँग विवाह तय भएको धार्मिक ग्रन्थहरूमा उल्लेख छ । त्यसैले मनाइने धनुषयज्ञमा अयोध्याबाट आएको जन्ती पनि सहभागी हुनेछ ।
बुधवार तीलकोत्सव, बिहीबार मटकोर र शुक्रवार विवाह ९स्वयंवर० कार्यक्रमको आयोजना गरिएको छ । शनिवार रामकलेवा पश्चात् विवाह पञ्चमी विधिवत् सम्पन्न हुन्छ ।
5 महीना पहिले
50 Post Views
.jpg)
