जनकपुरधाम, पुस १३ गते । नेपाल प्रिमियर लिग (एनपीएल) क्रिकेटको पहिलो संस्करणको उपाधि जितेको खुसियालीमा जनकपुर बोल्ट्सका खेलाडीहरूले जनकपुरधाममा भव्य ट्रफी परेड गरेका छन्। रामजानकी अन्तर्राष्ट्रिय रंगशालाबाट सुरु भएको यो परेडले नगरका प्रमुख चोकहरू परिक्रमा गर्दै जानकी मन्दिरमा समापन गरेको थियो। परेडमा सहभागी खेलाडीहरूले सुदूरपश्चिम रोयल्सलाई पाँच विकेटले पराजित गरेर उपाधि जितेको सफलतामा स्थानीय जनतासँग खुसी साट्दै ऐतिहासिक क्षणलाई थप विशेष बनाएका हुन्। यो जितले बोल्ट्सलाई ट्रफीसँगै १ करोड १० लाख रुपैयाँ नगद पुरस्कार समेत दिलाएको छ।
जनकपुरधाममै सीमित नराखी, बोल्ट्सले मधेश प्रदेशका अन्य जिल्लामा पनि ट्रफी परेड गर्ने योजना बनाएका छन्। महोत्तरी, सप्तरी, र रौतहटमा भोलि परेड हुनेछ भने पर्सि बारा र पर्सामा कार्यक्रम गरिनेछ। चौथो दिन सिरहा र सप्तरीमा परेड गर्दै ट्रफी परेडलाई औपचारिक रूपमा समापन गर्ने लक्ष्य रहेको छ। यस ऐतिहासिक जितको उत्सवले मधेश प्रदेशभर उल्लासमय वातावरण सिर्जना गरेको छ।