काठमाडाैं, पुस २९ : मलेसियामा अर्को साताबाट सुरु हुने यू–१९ महिला विश्वकपको तयारीका लागि खेलिएको पहिलो अध्यास नेपाल पराजित भएको छ। मलेसिया स्थित कोलेज तुन्कु जाफर मैदानमा भएको खेलमा नेपाल वेस्टइन्डिजसँग ९ रनले पराजित भयो।
नेपालले बलियो वेस्टइन्डिजसँग उत्कृष्ट खेल प्रदर्शन गरेको थियो। वेस्टइन्डिजलाई १०९ रनमा रोकेको नेपालले १९.५ ओभरमा १ सय रनमै अलआउट भयो।
नेपालका लागि सिमाना केसीले सर्वाधिक २३ रन बनाउँदा किरण कुँवर र कप्तान पुजा महतोले समान १८ रन बनाएए। ५४–६ को अवस्थाबाट किरण र सिमानाले ३० रनको साझेदारी गर्दै नेपाललाई जितको आशा जगाएका थिए। तर, नेपालको बोर्डमा ९८ रन हुँदा सिमाना पनि आउट भएपछि नेपाल पराजित भएको थियो।
नेपाललाई रोक्ने क्रममा बलिङमा तृशा हार्दत, अलिया विकेस र अमिह गिल्बेर्टले समान २ विकेट लिए।
त्यसअघि टस जितेर पहिला ब्याटिङ गरेको वेस्टइन्डिज २० ओभरमा ४ विकेट गुमाएर १०९ रन बनाएको थियो । उसका लागि कप्तान सामरा रमनाथले सर्वाधिक २५ रन बनाउँदा असाबी कलेन्डरले २३, जजारा कलेक्सटनले २२ रनको योगदान दिए।
बलिङमा नेपालका सिमाना केसी र रचना कुमारी चौधरीले समान १ विकेट लिए। 
अब नेपालले जनवरी १५मा अमेरिकासँग दोस्रा अभ्यास खेल खेल्ने छ।
जनवरी १८ बाट सुरु हुने विश्वकपमा नेपालले समूह डीमा छ। नेपालले जनवरी १८ मा बंगलादेश, जनवरी २० मा स्कटल्याण्ड र जनवरी २३ मा अस्ट्रेलियासँग खेल्नेछ।
समूहमा शीर्ष ३मा अटाउन सकेन नेपालले सुपर सिक्स खेल्ने छ। जहाँ थप तीन खेल्ने अवसर हुनेछ।
साभार ः काठमाडौं प्रेस