काठमाडौं, चैत १३ : नेपाल प्रहरीले आफ्ना कर्मचारीको सरुवासम्बन्धी मापदण्डलाई परिमार्जन तथा संशोधन गर्न मातहतका युनिटसँग सुझाव मागेको छ ।
नयाँ संगठन प्रमुख (आईजी) मा दीपक थापाको आगमनलगत्तै प्रधान कार्यालयले कर्मचारीको सरुवासम्बन्धी मापदण्ड तय गर्न राय मागेको हो ।
प्रहरीको कर्मचारी प्रशासन शाखाले यस सम्बन्धमा चैत १२ गते मातहतका सबै युनिटलाई परिपत्र गरेको छ।
पत्रमा कर्मचारीको सरुवासम्बन्धी मापदण्ड २०७९ लाई परिमार्जन र संशोधन गर्न र मापदण्डलाई थप प्रभावकारी बनाउन के–कस्ता प्रावधान थप गर्न उपयुक्त हुन्छ भनी सुझाव दिन भनिएको छ ।
साथै, विद्यमान सरुवा मापदण्डमा उल्लेख भएका कुन कुन बुँदाहरू संशोधन गर्दा प्रहरी कर्मचारीको सरुवा प्रणाली अझ व्यवस्थित र विश्वसनीय हुन्छ ? भन्दै प्रश्न पनि सोधिएको छ।
सुझाव उपलब्ध गराउन आगामी चैत १५ सम्मको समयसीमा तोकिएको छ।
साभार : काठमाडौं प्रेस
