जनकपुरधाम,चैत २५ गते । मधेश प्रदेशका ऊर्जा, सिँचाई तथा खानेपानी मन्त्रालयले ‘समृद्धि नेपालको आधार, सम्पूर्ण कृषियोग्य जमिनमा सिँचाइको बिस्तार’ भन्ने मूल नारासहित आज सिँचाई दिवस २०८१ मनाएको छ ।
धनुषा जिल्लाको लक्ष्मीनिया गाउँपालिका वडा नंं ३ को गजरीया–विगही सिँचाइ योजनाको कमाण्ड क्षेत्रमा सिँचाई तथा खानेपानीको विषयमा जनचेतना फैलाउनका लागि दिवस मनाइएको मधेस प्रदेशका ऊर्जा, सिँचाई तथा खानेपानी मन्त्रालयका निमित्त सचिव रामकुमार खंगले जानकारी दिनुभयो । 
नेपाली कांग्रेसका सह–महामन्त्री एवं पूर्व मन्त्री महेन्द्र यादवले नेपालको समृद्धिको आधार कृषि भएको र यसका लागि सिँचाई महत्वपूर्ण माध्यम भएको भन्नुहुँदै सिँचाई तथा पानीको महत्व बारेमा जनतालाई जागरूक बनाउनका लागि सिँचाई दिवस निक्कै महत्वपूर्ण भएको बताउनुभयो ।
जनताको जीवनसँग सरोकार भएको विषयमा दिवस मनाएर जनतालाई सचेत बनाउने काम भएको भन्नुहुँदै उहाँले मधेश प्रदेशका पर्ती तथा बाँझो जग्गामा सिँचाइको सुविधा प्रदान गरी कृषि उत्पादन बढाउन सकिने बताउनुभयो । 



पूर्व मन्त्री यादवले विश्वमा अत्यधिक माग रहेको बासमती तथा करिया कुमोद जातको धान उत्पादनमा विशेष ध्यान दिन धनुषाका किसानहरूलाई आग्रह  गर्नुभयो । 
उहाँले गणतन्त्र आएपछि नेपालमा बिजुली, सडक, सिँचाई तथा अन्य क्षेत्रमा निक्कै ठूलो प्रगति भएको बताउनुभयो । 
मधेश प्रदेशका ऊर्जा, सिँचाई तथा खानेपानी मन्त्री शेषनारायण यादवले जनताको खेत खेतमा सिँचाई सुविधा प्रदान गर्न भूमिगत सिँचाइसहित नदी प्रणालीको सिँचाइको पूर्वाधार निर्माणको काममा प्रदेश सरकार लागिपरेको बताउनुभयो । 
उहाँले मन्त्रालयले किसानको मागको आधारमा भूमिगत सिँचाइका लागि खेत खेतमा बिजुली तथा स्यालो ट्युबवेल जडानका लागि विभिन्न योजनाहरू सञ्चालन गरेको बताउनुभयो । 
नेपाली काँग्रेसका प्रमुख सचेतक कुमरकान्त झाले नेपालको आर्थिक विकास तथा समृद्धिका लागि सिँचाइको पूर्वाधार निर्माण आवश्यक भएको भन्नुहुँदै सिँचाइको अभावमा किसानले चाहे जतिको कृषि उत्पादन गर्न नसकेको बताउनुभयो । 
गजरीया–विगही सिँचाई योजना उपभोक्ता समितिका अध्यक्ष जितेन्द्र यादवको अध्यक्षतामा भएको सो कार्यक्रममा गजरीया विगही सिँचाई योजनाको नहरको सरसफाई यसै आर्थिक वर्ष भित्रमा सम्पन्न गर्ने लक्ष्य रहेको छ । मधेश प्रदेशका जिल्लाहरूमा कूल कृषि योग्य भूमि मध्ये २८.६८ प्रतिशत भूमिमा सिँचाई सुविधा पुगेको छ । जसमा साना तथा ठूला सिँचाई योजनाको योगदान रहेको छ । 

साभार : रेडियो नेपाल
                                    

5 दिन पहिले    19 Post Views