जनकपुरधाम, पुष ६ गते । नेपालको शिक्षा जगतमा छुट्टै पहिचान स्थापित गर्न सफल जनकपुरधामस्थित सिद्धार्थ शिशु सदनले आफ्नो ४५ औँ वार्षिकोत्सव भव्य रूपमा मनाउँदै छ। विद्यालयले २०८२ साल पौष ५ गते शनिबारदेखि तीन दिनसम्म विविध शैक्षिक, सामाजिक तथा मानवीय कार्यक्रमहरूको आयोजना गरी वार्षिकोत्सव मनाउन लागेको हो।

विद्यालयका प्रिन्सिपल राजु यादवका अनुसार वार्षिकोत्सवको पहिलो दिन पौष ५ गते हनुमान आराधना कार्यक्रमको आयोजना गरियो। अध्यात्मिक चिन्तन र सकारात्मक ऊर्जाको विकास गर्ने उद्देश्यसहित आयोजना गरिएको उक्त कार्यक्रममा विद्यालय परिवार, विद्यार्थी, अभिभावक तथा शुभेच्छुकहरूको सहभागिता रहेको थियो।

त्यसैगरी दोस्रो दिन पौष ६ गते (आज) बिहान ८ बजेदेखि ११बजेसम्म रक्तदान कार्यक्रम आयोजना गरियो जसमा ३० जनाले रक्तदान गरे। “रक्तदान जीवनदान” भन्ने मूल नारासहित सञ्चालन भएको उक्त कार्यक्रमले मानव जीवनको रक्षा र सामाजिक उत्तरदायित्वको भावना अभिवृद्धि गर्ने विश्वास लिइएको छ। त्यस्तै आजै बिहान १० बजेदेखि दिउँसो २ बजेसम्म खाद्यान्न मेला (Food Carnival) पनि आयोजना गरिएको छ ।

कक्षा ५ देखि १० सम्मका विद्यार्थीहरूको सक्रिय सहभागिता रहेको उक्त मेलाले “स्वच्छ र स्वस्थ आहार जीवनको आधार बनाऔँ” भन्ने सन्देश प्रवाह गर्नेछ भने सहभागीहरूले विभिन्न परिकारको स्वाद लिने अवसर प्राप्त गर्नेछन।
वार्षिकोत्सवको अन्तिम दिन पौष ७ गते बिहान ११बजेदेखि दिउँसो २बजेसम्म जानकी वृद्धाश्रम, कविर बाल आश्रम तथा मानवसेवा आश्रममा सहयोग कार्यक्रम सञ्चालन गरिनेछ। शिक्षक तथा कर्मचारीहरूको सहभागितामा हुने उक्त कार्यक्रमले “सहयोगको हात बढाऔँ, सहयोग र सद्भावले बाँचौँ र बचाऔँ” भन्ने मानवीय सन्देश समाजमा प्रवाह गर्ने लक्ष्य राखेको छ।
सिद्धार्थ शिशु सदन माध्यमिक विद्यालयले शिक्षा मात्र होइन, सामाजिक चेतना, मानवीय मूल्य र सद्भावको प्रवर्द्धनमा समेत निरन्तर योगदान दिँदै आएको भन्दै विद्यालय परिवारले सबैलाई कार्यक्रममा सहभागी भई सफल बनाउन आग्रह गरेको छ।

 
 
                                    

2 घन्टा पहिले    44 Post Views