जनकपुरधाम, श्रावण २६ गते ।  जनकपुरधाम उपमहानगरपालिकाले गाई–बाच्छामा देखिने लम्पी स्किन रोग (LSD) को रोकथाम तथा नियन्त्रणका लागि निःशुल्क खोप सेवा सञ्चालन गर्ने भएको छ। उपमहानगरपालिकाको नगर कार्यपालिकाको कार्यालयले जारी गरेको सूचनाअनुसार विभिन्न वडामा रहेका गाई–बाच्छामा लम्पी स्किन रोग देखिन थालेपछि रोगको रोकथाम तथा नियन्त्रणका लागि २०८३ जेठ २७ गतेदेखि निःशुल्क खोप सेवा सञ्चालन गरिने भएको हो। उपमहानगरपालिकाको कृषि तथा पशुपन्छी विकास शाखामार्फत गत आर्थिक वर्षमा गाई–बाच्छामा लम्पी स्किन रोगविरुद्ध खोप सेवा सञ्चालन गरिए पनि खोप नलगाएका गाई तथा बाच्छा–बाच्छीमा रोग लाग्ने जोखिम रहेकाले सम्बन्धित पशुपालक तथा कृषकलाई खोप लगाउन आग्रह गरिएको छ। उपमहानगरपालिकाले खोप नलगाएका गाई तथा बाच्छा–बाच्छीलाई खोप लगाउँदा पशुधनमा हुन सक्ने क्षति न्यूनीकरणमा सहयोग पुग्ने जनाएको छ।

साथै, पशुपालक तथा कृषकलाई आफ्ना पशुहरूलाई अनिवार्य रूपमा खोप लगाउन अनुरोध गरिएको छ। त्यस्तै, रोग लागेका पशुमा उपचारका लागि कृषि तथा पशुपन्छी सेवा केन्द्र, जनकपुरधाम–१७, तेतरियाबाट उपचार सेवा लिन उपमहानगरपालिकाले आग्रह गरेको छ। नगर कार्यपालिकाको कार्यालयका पशु चिकित्सक डा. अमर कुमार साहले जारी गरेको सूचनामा लम्पी स्किन रोगको जोखिम न्यूनीकरणका लागि समयमै खोप लगाउन पशुपालकलाई आग्रह गरिएको छ।