जनकपुरधाम, भाद्र १२ गते । विपद् तथा प्राकृतिक प्रकोपबाट प्रभावित नागरिकको उद्धार, राहत तथा पुनर्स्थापनामा सहयोग पुर्‍याउने उद्देश्यले मोडर्न इङ्गलिस सेकेन्डरी बोर्डिङ स्कुल, जनकपुरधामले प्रधानमन्त्री दैवी प्रकोप उद्धार तथा राहत कोषमा रु. २५ हजार सहयोग गरेको छ।
विद्यालयले सामाजिक उत्तरदायित्व र मानवीय सेवाको भावनासहित कोषमा उक्त रकम प्रदान गरेको जनाएको छ। विपद्को समयमा पीडित तथा प्रभावित परिवारलाई राहत उपलब्ध गराउन सहयोग पुगोस् भन्ने उद्देश्यले विद्यालयले यो सहयोग गरेको हो।
विद्यालय व्यवस्थापन, शिक्षक तथा विद्यार्थीहरूमा सामाजिक सेवा र मानवीय सहयोगको भावना विकास गर्ने उद्देश्यले पनि यस्ता गतिविधिलाई निरन्तरता दिइने विद्यालयले जनाएको छ।
प्राकृतिक विपद्का बेला राज्यको राहत तथा उद्धार अभियानमा सहयोग गर्ने मोडर्न इङ्गलिस बोर्डिङ स्कुलको यस कदमलाई सामाजिक उत्तरदायित्वप्रतिको सकारात्मक पहलका रूपमा लिइएको छ।
रसुवास्थित भोटेकोशी नदीमा बुधबार बिहान भीषण बाढी आउँदा ठूलो जनधनको क्षति भएको छ । PPPबाढीका कारण रसुवासहित तटीय क्षेत्रमा पर्ने नुवाकोट, धादिङ र गोरखा लगायतका जिल्लाहरू नराम्ररी प्रभावित बनेका छन् । यस विपद्बाट प्रभावित नागरिकहरूलाई तत्काल सुरक्षित स्थानमा स्थानान्तरण गरी खाना–बस्नको प्रबन्ध मिलाउनुका साथै दीर्घकालीन रूपमा पुनस्र्थापना गर्न आवश्यक रहेको भन्दै प्रधानमन्त्री तथा मन्त्रिपरिषद्को कार्यालयले देश तथा विदेशमा रहेका सम्पूर्ण नेपाली नागरिक, संघ–संस्था, व्यवसायी तथा दातृ निकायहरूलाई आर्थिक सहयोगका लागि हार्दिक अपिल गरेको छ ।