जनकपुरधाम, असार २६ गते  । धनुषा-सिरहा जोड्ने कमला नदीमा आएको बाढीमा फसेका ६ जनाको सशस्त्र प्रहरीले सकुशल उद्धार गरेको छ ।सिरहाको कल्याणपुर नगरपालिका ६ का ५५ वर्षीय मनिया कापर, ५० वर्षीय सेवक साह, ३७ वर्षीय मोहम्द हाकिम राई र ३५ वर्षीय अलादिन राईलाई सशस्त्र प्रहरीले सकुशल उद्धार गरेको हो ।दाउरा लिन गएको बेला अचानक बाढीको बहाव बढेपछि उनीहरू फसेका थिए । स्थानीयले दिएको जानकारी पाएर सशस्त्र प्रहरी बल नेपाल सुरक्षा वेश कल्याणपुरको टोली नदीमा पुगेर उनीहरूलाई ट्युब बोटको सहयोगले सकुशल उद्धार गरेको छ ।
बाढीले तटबन्धमा क्षति
कमला नदीको पश्चिमतर्फको तटबन्धमा बाढीले क्षति पुर्‍याएको छ । धनुषा गणेशमान चारनाथ नगरपालिका ८ देखि सबैला नगरपालिका ४ पटेर्वासम्म तटबन्धमा क्षति पुर्‍याएको हो ।तटबन्धमा क्षति पुर्‍याएपछि धनुषाका प्रमुख जिल्ला अधिकारी रामुराज कडरिया, धनुषाका एसपी भुवनेश्वर तिवारी, सशस्त्रका एसपी दर्शन गिरी, सबैलाका मेयर कारी राम यादवसहितको टोलीले निरीक्षण गरेका छन् ।क्षतिग्रस्त तटबन्धको मर्मत तथा सुधारको काम तीन दिनभित्रमा सम्पन्न गर्न सम्बन्धित नगरपालिकालाई निर्देशन दिएको प्रमुख जिल्ला अधिकारी कडरियाले जानकारी दिए ।
साभार : नेपाल प्रेस
                                    

5 महीना पहिले    127 Post Views