जनकपुरधाम , कार्तिक ११ गते । पूर्व उपप्रधानमन्त्री एवं नेपाली काँग्रेसका पूर्व उपसभापति तथा नेता विमलेन्द्र निधिले सङ्घीयताको विपक्षमा हुने कुनै पनि निर्णय एवं गतिविधि स्वीकार्य नहुने बताउनुभएको छ ।
नेपाल ट्रेड युनियनको धनुषा प्रथम जिल्ला परिषद्को आज जनकपुरधाममा उद्घाटन गर्दै उहाँले मधेश प्रदेश सरकारको मुख्यालय रहेको जनकपुर चुरोट कारखानालाई निजीकरणको नाउँमा त्यसको जग्गा बिक्री गर्न नपाइने बताउनुभयो ।
नेता निधिले सङ्घीयतालाई बलियो बनाउन प्रहरी तथा निजामती कर्मचारीको समायोजन शीघ्र रुपमा गर्नुपर्ने बताउँदै यससम्बन्धी प्रदेश सरकारले बनाएका कानूनलाई मान्यता दिन आग्रह गर्नुभयो ।
नेपाली काँग्रेसका केन्द्रीय सदस्य मुक्ता कुमारी यादवले नेपाली काँग्रेस बलियो नभएसम्म मुलुकमा स्थिरता विकास एवं समृद्धिले गति नलिने बताउनुभयो ।
नेपाल ट्रेड युनियनको धनुषाका जिल्ला अध्यक्ष महावीर दासको अध्यक्षतामा भएको कार्यक्रममा मधेश प्रदेश सभाका सदस्य रामसरोज यादव, नेपाली काँग्रेस धनुषाका जिल्ला सभापति योगेन्द्र पञ्जियार, नेपाली काँग्रेस धनुषाका उपसभापति गणेश झा, नेपाल शिक्षक संघ धनुषाका जिल्ला अध्यक्ष रामस्नेही यादव सहितका वक्ताहरूले बोल्नुभएको थियो ।
साभार : रेडियो नेपाल 
                                    

6 महीना पहिले    98 Post Views