काठमाडौं ,श्रावण ८ गते । सरकारले मधेश प्रदेशलाई तीन महिनाको लागि विपद् सङ्कटग्रस्त क्षेत्र घोषणा गरेको छ ।
बुधबार बसेको मन्त्रिपरिषद् बैठकको निर्णय अनुसार गृह मन्त्रालयले नेपाल राजपत्रमा सूचना प्रकाशित गर्दै विपद् जोखिम न्यूनीकरण तथा व्यवस्थापन ऐन, २०७४ को दफा ३२ को उपदफा १ बमोजिम यस्तो निर्णय गरेको मन्त्रालयले जनाएको हो ।
सूचनामा भनिएको छ, ‘नेपाल सरकारले विपद् जोखिम न्यूनीकरण तथा व्यवस्थापन ऐन, २०७४ को दफा ३२ को उपदफा १ बमोजिम नेपाल राजपत्रमा यो सूचना प्रकाशित भएको मितिले तीन महिना अवधिको लागि मधेश प्रदेशभर विपद् सङ्कटग्रस्त क्षेत्र घोषणा गरेकोले यो सूचना प्रकाशन गरिएको छ।’
मधेश प्रदेशमा देखिएका विपद् अवस्थालाई सम्बोधन गर्न सरकारले आवश्यक कानुनी व्यवस्था र संयन्त्र सक्रिय गर्नेगरी विपद् संकटग्रस्त क्षेत्र घोषणा गरिएकामे गृह मन्त्रालयका निमित्त सचिव जयनारायण आचार्यले जानकारी दिए ।
नेपालको कुनै ठाउँमा गम्भीर प्रकृतिको विपद् उत्पन्न भएकोले विपद् सङ्कटग्रस्त क्षेत्र घोषणा गर्न आवश्यक देखिएमा नेपाल सरकारले नेपाल राजपत्रमा सूचना प्रकाशन गरी त्यस्तो क्षेत्रको सिमाना र अवधि तोकी विपद् सङ्कटग्रस्त क्षेत्र घोषणा गर्न सकिने कानूनी व्यवस्था छ ।
उक्त अवधिभित्र विपद्बाट उत्पन्न स्थिति नियन्त्रण हुन नसकेमा नेपाल सरकारले नेपाल राजपत्रमा सूचना प्रकाशन गरी घोषणाको अवधि बढाउन सक्ने व्यवस्था छ ।
साभार : नेपाल प्रेस
_1781661152.jpg)
