काठमाडौं ,असोज १२ गते । एसिया कप क्रिकेट २०२५ को उपाधि लगातार दोस्रोपटक भारतले जितेको छ । आइतबार राति दुबई अन्तर्राष्ट्रिय क्रिकेट मैदानमा भएको फाइनलमा भारतले पाकिस्तानलाई ५ विकेटले पराजित गर्दै उपाधि उचालेको हो ।
पाकिस्तानले दिएको १४७ रनको लक्ष्य भारतले १९।४ ओभरमा ५ विकेटको क्षतिमा भेट्टायो । अन्तिम ओभरमा १० रन आवश्यक रहँदा तिलक वर्मा र रिंकु सिंहले विजयी प्रहार गर्दै भारतलाई जित दिलाए ।
भारतका तिलक वर्माले अविजित ६९ रनको म्याच जिताउने पारी खेले । उनले ५३ बलमा ३ चौका र ४ छक्का प्रहार गरे । त्यस्तै शिवम दुबेले ३३ तथा सन्जु सामसनले २४ रनको योगदान गरे ।
पाकिस्तानका बलर फहीम अशरफले ३ विकेट लिए भने शाहीन अफ्रिदी र अबरार अहमदले एक–एक विकेट हात पारे ।
यसअघि टस हारेर पहिले ब्याटिङ गरेको पाकिस्तान १९।१ ओभरमा १४६ रनमा अलआउट भएको थियो । सुरुवात राम्रो गरे पनि पाकिस्तानको पारी मध्य ओभरपछि धराशायी भएको हो ।
पाकिस्तानका लागि ओपनर शाहिबजादा फरहानले ५७ रन बनाए भने फखार जमानले ४६ रनको योगदान गरे । तर, अन्य ब्याटर दोहोरो अंकमा रन बनाउन असफल रहे ।
भारतका स्पिनर कुलदीप यादवले उत्कृष्ट बलिङ गर्दै ४ विकेट लिए । उनले ४ ओभरमा ३० रन खर्चे । त्यस्तै जसप्रित बुमराह, वरुण चक्रवर्ती र अक्षर पटेलले दुई–दुई विकेट हात पारे ।
यससँगै भारतले एसिया कपमा नवौंपटक उपाधि जितेको छ । यसअघि सन् २०२३ मा भएको एसिया कपमा भारतले श्रीलंकालाई हराउँदै उपाधि जितेको थियो ।
साभार : नेपाल प्रेस
