जनकपुरधाम,,असोज १४ गते । सप्तमी तिथिमा आराध्य देवी दुर्गाको बेलतोडी विधिसँगै जनकपुरधामलगायत तराई–मधेशका शक्तिपीठहरूमा माटोका मूर्तिमा आँखाको नानी थप्ने वैदिक प्रक्रिया सम्पन्न भएको छ। षष्ठीका दिन निमन्त्रित जोडाबेल सोमबार तोडेर शक्तिपीठमा ल्याई बेलको डाँठबाट दुर्गाको आँखा कोर्ने विधि सम्पन्न गरिएको हो। जनकपुरधामस्थित राजदेवी मन्दिरमा सोमबारदेखि मंगलबारसम्म खोइँच भराइँ सञ्चालन हुँदैछ भने महाअष्टमीका दिन बेलुको बोकाबली कार्यक्रम तय गरिएको महावीर युवा कमिटीले जनाएको छ।

यस वर्ष तिथिमितिमा हेरफेर हुँदा कतिपय शक्तिपीठमा सोमबार नै बेलतोडी र खोइँच भराइँ कार्य सम्पन्न भएको छ। यसक्रममा ७ हजारभन्दा बढी भक्तजनले बलीका लागि रसिद काटेका छन्। तराई–मधेशका गाउँ–गाउँमा दुर्गा पूजाको उत्सव धुमधामका साथ मनाइँदै छ। मैथिल परम्परा अनुसार देवीलाई माइती आएकी छोरीझैँ पूजा गर्ने, मिठा परिकार अर्पण गर्ने र विसर्जनका बेला सोहर गीत गाई भावनात्मक विदाइ गर्ने चलन छ। यो परम्परा धार्मिक मात्र नभई सामाजिक एकता र सांस्कृतिक पहिचानको प्रतीकका रूपमा निरन्तरता पाउँदै आएको छ।
                                    

2 महीना पहिले    96 Post Views