काठमाडौँ ,कार्तिक १९ गते । नेपाल वायुसेवा निगमको सञ्चालक समिति अध्यक्षको जिम्मेवारी निगमकै उपाध्यक्ष विक्रम राई र प्रवक्तामा निगमका ‘कर्पोरेट डाइरेक्टर’ अनिल घिमिरेलाई दिइएको छ । 
निवर्तमान अध्यक्ष युवराज अधिकारीको कार्यकाल सकिएसँगै अर्को अध्यक्ष नियुक्त नभएसम्मका लागि राईलाई नै अध्यक्षको जिम्मेवारी दिइएको हो । अध्यक्ष राईलाई संस्कृति, पर्यटन तथा नागरिक उड्डयन मन्त्रालयका निमित्त सचिव इन्दु घिमिरेले मङ्गलबार मन्त्रालयमा पद तथा गोपनीयताको शपथ गराउनु भएको छ । शपथ ग्रहणपछि अध्यक्ष राईले निगम सञ्चालक समितिको कार्यालयमा कार्यभार सम्हाल्दै प्रधानमन्त्री र जेनजी आन्दोलनको चाहना अनुसार निगममा देखिने गरी सुधार गर्ने प्रतिबद्धता जनाउनुभयो । 
उहाँले हाल ए३२० जहाजमा प्रयोग हुँदै आएको भाडाको एउटा इञ्जिन सम्बन्धित कम्पनीलाई फिर्ता गर्दै मर्मतका लागि इजरायल पठाइएको निगमको इञ्जिन जडान १५ दिनभित्र टुङ्ग्याउन निर्देशन दिनुभयो । 
उहाँले बेलाबेलामा मिडियामा र जनमानसमा उठ्दै आएको ‘बिजनेस क्लास’को टिकटलाई ‘अपग्रेड’ गर्ने प्रवृत्ति तत्काल बन्द गर्न, यात्रु ‘व्यागेज’ नीतिमा समयानुकूल परिमार्जन गर्न र यात्रु व्यागेज टुटफुट सम्बन्धमा आएको जनगुनासो यथाशीघ्र सम्बोधन गर्न पनि निर्देशन दिनुभयो । 
अध्यक्ष राईले प्रश्न उठेका करार तथा ज्यालादारीमा नियुक्त गरिएका कर्मचारीको नियुक्ति नियम सङ्गत बदर गर्नसमेत निर्देशन दिनुभयो । उहाँले निगमको व्यवस्थापकीय कार्यमा आफ्नो कुनै हस्तक्षेप नरहने स्पष्ट पार्नुभयो । 
नवनियुक्त अध्यक्ष राईले कार्यभार सम्हालेसँगै उहाँलाई स्वागत गर्दै निगमका निमित्त महाप्रबन्धक जनकराज कालाखेतीसहित विभागीय प्रमुखहरुले आ–आफ्नो विभागबाट भइरहेका कामका बारेमा जानकारी गराउनु भएको थियो ।
निमित्त महाप्रबन्धक कालाखेतीले मङ्गलबार नै निगमको कर्पोरेट विभागका निर्देशक अनिल घिमिरेलाई प्रवक्ताको जिम्मेवारी दिनुभएको छ । झण्डै दुई दशकदेखि निगमका विभिन्न जिम्मेवारीमा रहनुभएका घिमिरेले संस्थाको सूचना तथा सन्देश नागरिकका बीचमा पुर्‍याउन, संस्थाको छवि सकारात्मक बनाउन र सञ्चार माध्यमहरूसँग समन्वय गर्न प्रभावकारी भूमिका निर्वाह गर्ने बताउनु भएको छ । 

साभार : रेडियो नेपाल
                                    

6 घन्टा पहिले    5 Post Views