जनकपुरधाम, मंसिर २९ गते । मधेस प्रदेशका मुख्यमन्त्री कृष्णप्रसाद यादवले आगामी पुस ४ गते शुक्रवार विश्वासको मत लिन लाग्नु भएको छ । 
मुख्यमन्त्रीको निवास मधेश भवनमा आज बसेको सात दलको बैठकबाट पुस ४ गते विश्वासको मत लिने सहमति भएको जनता समाजवादी पार्टी (जसपा) नेपालका संसदीय दलका नेता सरोज कुमार यादवले पत्रकारहरूलाई जानकारी दिनु भएको छ । 
यादवले विश्वासको मत अघि नै सहमति भएको खण्डमा सबै दलबाट एक–एकजनालाई मन्त्रीमा नियुक्त गरिने विषयमा छलफल भएको र सहमति नभएको खण्डमा विश्वासको मतपछि मन्त्रीपरिषद् विस्तार गरिने जानकारी दिनु भयो । 
जसपाका नेता यादवले नेकपा एमालेको अहिले महाधिवेशन काठमाडौँमा भइरहेकोले महाधिवेशन सकिएपछि ४ गते विश्वासको मत लिने सात दलको बैठकमा सहमति भएको जानकारी दिनु भयो ।

उहाँले सभामुख पदमा आफूहरूको दाबी स्वाभाविक भएको बताउनु भयो । मधेश प्रदेश सरकारमा रहेका सबैभन्दा ठुलो दलको रूपमा रहेको नेपाली काँग्रेसले मुख्यमन्त्री पाएपछि सभामुख पाउनु आफूहरूको अधिकार नै भएको जसपाले जनाएको छ । 
मधेस प्रदेश सभाको नयाँ सभामुख चयनका लागि प्रक्रिया बढाउन आगामी पुस २ गते मधेश प्रदेश सभाको बैठक बोलाइएको हो । छ दलको समर्थनमा मुख्यमन्त्री बनेका कृष्णप्रसाद यादवको मन्त्रिपरिषदमा जनमत पार्टीका संसदीय दलका नेता महेश प्रसाद यादव अर्थमन्त्री रहनु भएको छ भने नेकपा एकीकृत समाजवादी पार्टीका प्रमुख सचेतक कनिष पटेल र नेपाली काँग्रेसका जंगिलाल राय बिना विभागीय मन्त्री रहनु भएको छ ।
नेपाली काँग्रेसका संसदीय दलका नेता यादव ६ दलका ७७ जना प्रदेश सभा सदस्यहरूको समर्थनमा मङ्सिर १९ गते मधेश प्रदेशका छैँठौ मुख्यमन्त्रीमा मधेश प्रदेशका प्रदेश प्रमुख डा. सुरेन्द्रलाभ कर्णले नियुक्त गर्नु भएको थियो ।  

साभार ः रेडियो नेपाल
                                    

2 महीना पहिले    81 Post Views