जनकपुरधाम, पुष ६ गते । मधेश प्रदेशका सभामुख पदमा जनता समाजवादी पार्टी नेपालका प्रदेश सभा सदस्य एवं पार्टीका प्रमुख सचेतक रामअशिष यादव निर्वाचित हुनुभएको छ ।
मधेश प्रदेश सभाको आज बसेको बैठकले सभामुख पदमा यादवलाई निर्वाचित गरेको हो । बैठकमा उपस्थित रहनुभएका ९६ जना प्रदेश सभा सदस्यमध्ये यादव ७२ मत प्राप्त गर्दै सभामुख पदमा निर्वाचित हुनुभएको बैठकको अध्यक्षता गर्नुभएका उपसभामुख बविता राउत ईशरले घोषणा गर्नुभयो ।
यादवको विपक्षमा २४ मत परेको छ । कायम रहेको १०७ प्रदेश सभा सदस्यमध्ये बहुमतका लागि ५४ जनाको मत आवश्यक पर्छ ।
सभामुखमा यादव बहुमतले निर्वाचित हुनु भएपछि नेकपा एमालेका प्रदेश सभाका सदस्य शारदा देवी थापाको प्रस्तावमा सभामुख पदका लागि उम्मेदवारी दर्ता गराउनुका भएका नेकपा एमालेका प्रदेश सभा सदस्य त्रिलोकी प्रसादको प्रस्तावमा छलफल गर्नु आवश्यक नभएको उपसभामुखले घोषणा गर्नुभयो ।
सात दलको समर्थनमा सभामुखमा निर्वाचित हुनुभएका यादवले रेडियो नेपालको स्थानीय सम्वाददाताको रुपमा धनुषामा लामो समयसम्म काम गर्नुभएको थियो । उहाँले अङ्ग्रेजी विषयको आधारभूत तहको शिक्षकको रुपमा पनि काम गर्नुभएको थियो । 

साभार : रेडियो नेपाल
 
                                    

2 महीना पहिले    81 Post Views