जनकपुरधाम, फाल्गुन १६ गते । सीके राउत नेरृत्वको जनमत पार्टीका तत्कालीन केन्द्रीय कार्यकारिणी सदस्य एवं विदेश विभाग प्रमुख शम्भु साह नेपाली कांग्रेस प्रवेश गरेका छन्।
शुक्रबार जनकपुरधामको मिल्स एरियास्थित निधि निवासमा आयोजित कार्यक्रममा कांग्रेस नेता एवं धनुषा ३ का प्रतिनिधिसभा सदस्य पदका उम्मेद्वार विमलेन्द्र निधिले उनलाई पार्टी प्रवेश गराएका हुन्।
कांग्रेस प्रवेश गरेका साहले २०७९ सालको निर्वाचनमा धनुषा-३ मा जनमत पार्टीबाट चुनाव लडेर ८ हजार बढी मत ल्याएका थिए।

साहले कांग्रेसले मात्रै मुलुकमा राजनीतिक स्थायित्व दिनसक्ने भएकाले पार्टी प्रवेश गरेको बताए। राजनीतिक घटनाक्रमहरूमा विभिन्न लहर चले पनि सत्यका अगाडि टिक्न नसक्ने उनको भनाइ छ।
‘कुनै बेला जनमत पार्टीको पनि लहर चलेको थियो, बिस्तारै हराएर गयो,’ उनले भने,’अहिले पनि विभिन्नखाले लहरको हल्ला चलेको छ, यो पनि हराएर जान्छ।’
निधिलाई निर्वाचित गराउन आफू आजैदेखि सक्रिय भएर लाग्ने भन्दै उनले सबैलाई यो अभियानमा जुट्न अनुरोध गरे।
साहलाई पार्टीमा स्वागत गर्दै नेता निधिले संघीयता, लोकतन्त्र, गणतन्त्रलगायतका उपलब्धिको रक्षा गर्न कांग्रेसलाई जिताउनुपर्नेमा जोड दिए।
आफूले यसअघि पनि विकासलाई प्राथमिकतामा राखेको उल्लेख गर्दै उनले आगामी दिनमा पनि यस्ता कार्यहरूलाई निरन्तरता दिइरहने बताए।
निधिले कांग्रेस प्रवेश गरेका साहसँग पार्टीमा कुनै विभेद नहुने प्रस्ट पारे।
                                    

1 घन्टा पहिले    4 Post Views