जनकपुरधाम ,चैत्र २ गते । जनकपुरधामको रामजानकी बहुउद्देश्यीय अन्तर्राष्ट्रिय रङ्गशालामा आउँदो चैत्र ७ गते शनिवारदेखि पिएम कप क्रिकेट सुरु हुने भएको छ ।
राष्ट्रिय स्तरको सो प्रतियोगिताको उद्घाटन खेलदेखि १७ वटा खेल सोही रङ्गशालामा हुने जिल्ला क्रिकेट संघ धनुषाले जनाएको छ ।
एक दिवसीय क्रिकेट प्रतियोगितामा नेपालका ७ प्रदेशका ७ टिम तथा तीन वटा विभागीय टिम गरी कूल १० टिमको सहभागिता रहने आयोजक नेपाल क्रिकेट सङ्घले जनाएको छ । मधेश प्रदेशको राजधानी जनकपुरधाममा उद्घाटन खेल हुनेछ भने फाइनल खेल मधेश प्रदेशकै पर्सा जिल्लाको नारायणी रङ्गशालामा हुने भएको छ ।
नेपाल क्रिकेट संघका अनुसार पिएम कपमा १९ वटा खेल वीरगन्जमा रहेको नारायणी रङ्गशालामा हुने छन् भने १० खेल काठमाडौँमा हुने छन् ।
नेपालका सबै राष्ट्रिय मिटका खेलाडीहरू सहभागी हुने प्रतियोगिता ५० ओभरको हुने भएकाले यसले खेलाडीमा लामो समयसम्म खेल्ने क्षमताको विकास हुने विश्वास नेपाल क्रिकेट सङ्घको छ ।
साभार : रेडियो नेपाल
