जनकपुरधाम, चैत्र ५ गते । चैती नवरात्रको अवसरमा जनकपुरधामको शक्तिपीठहरुमा पूजा अर्चनाका लागि भक्तजनहरूको आज बिहान देखि भिड बढेको छ । 
जनकपुरधामको प्रसिद्ध शक्तिपीठ राजदेवी मन्दिरमा पूजा अर्चनाका लागि बिहान देखि नै भक्तजनहरूको ठूलो भिड रहेको छ । यसका साथै जनकपुरधामको पियरीयामाई, अमरखाना सहितका शक्तिपीठमा पूजा अर्चना गर्नेहरुको भिड रहेको छ । 
जनकपुरधामको वडा नंं ८ मा सतानन्द युवा क्लबको आयोजनामा यस पटक भव्य रुपमा चैती नवरात्राको शुरुआत भएको छ । पुरुषोत्तम नारायण झाको अध्यक्षतामा आज बिहान भव्य कलशयात्रा निकालिएको छ । बाजागाजा सहित कलशयात्रा निकालिएको थियो । 
माटोको आकर्षक दुर्गा सहितका देवी देउताको प्रतिमा निर्माण गरेर पूजाको आयोजना भइरहेको छ । यसै अवसरमा चैत्र ९ गते महादेवको लखराम पूजा, १० गते वेलनौति, १२ गते कन्या पूजा, १३ गते हवन र सोही दिन विसर्जन गर्ने कार्यक्रम रहेको पूजा संयोजक पण्डित सिताराम झाले जानकारी दिनु भयो । 
यसका साथै प्रत्येक दिन साँझ महाआरती तथा झिझिया सहितका सांस्कृतिक कार्यक्रमहरू गरिने भएको छ । जनकपुरधामको रामानन्द चोकमा प्रत्येक वर्ष झैँ यस वर्ष पनि चैते नवरात्राको अवसरमा विशेष पूजापाठको आयोजना गरिएको छ । 
सो ठाउँमा भव्य रुपमा माता दुर्गाको स्वरूपको प्रतिमा निर्माण गरेर विशेष पूजापाठको आयोजना गरिएको छ । वर्षको चार पटक नवरात्रा मनाए पनि आश्विन तथा चैत्र महिनामा मनाइने नवरात्राको विशेष महत्व रहेको छ ।  
साभार रेडियो नेपाल