सुनसरी, साउन ११ : सुनसरीको देवानगञ्ज गाउँपालिका–३ कप्तानगञ्जमा आइतबार राति भएको झडपको घटनामा स्थानीयको मृत्यु भएको विरोधमा सदरमुकाम इनरुवामा पनि प्रदर्शन भएको छ।
कप्तानगञ्ज क्षेत्रमा कर्फ्यू जारी छ। कर्फ्यूकाबीच प्रदर्शन जारी राखेपछि त्यसक्षेत्रमा सेना परिचालन गरिएको छ। त्यहाँको स्थिति विस्तारै सामान्य बन्दै गएको बताइएको छ।
कप्तानगञ्ज क्षेत्रमा सेना परिचालन भएपछि स्थानीयले नजिकैको लौकही र सदरमुकाम इनरुवामा विरोध प्रदर्शन गरेका हुन्।
घटनामा गोली लागेर स्थानीय ओमप्रकाश मेहताको मृत्यु भएको थियो। घटनामा घाइते भएकाहरूको विराटनगरका विभिन्न अस्पतालमा उपचार भइरहेको छ। केहीको अवस्था गम्भीर रहेको बताइएको छ।
जिल्ला प्रशासन कार्यालय सुनसरीमा सर्वपक्षीय बैठक भइरहेको छ। यसमा राजनीतिक दलका प्रतिनिधि तथा सुरक्षा अधिकारीहरू सहभागी छन्।
साभार ः काठमाडौं प्रेस
