जनकपुरधाम, १३ गते पुस ।जनकपुरधाम निवासी विजय कुमारी चौधरी अमेरिकाका लागि नेपालको तर्फबाट पर्यटन सद्भावना दूतमा नियुक्त हुनु भएको छ । नेपाल सरकारको मन्त्री स्तरीय निर्णय अनुसार अमेरिका स्थित क्यालिफोर्निया राज्यका लागि पर्यटन सदभावना दूतमा चार बर्षका लागि उहाँलाई नियुक्त गरिएको छ । उहाँ एशोसिएशन अफ नेपाली तराईयन ईन अमेरिका( एएनटिए )को अन्तर्राष्ट्रिय उपाध्यक्ष, फ्रिमन्ट सगरमथा लायन्स क्लबको प्रेसीडेन्ट,एनआरएनए को सक्रिय अभियन्ता र पूर्व शिक्षक हुनुहुन्छ । जनकपुरधामको जानकी माविमा शिक्षण पेसामा रहेका विजय चौधरी केहि वर्ष देखि अमेरिकाको क्यालिफोर्नियामा बस्दैहुनुहुन्छ । वहां चार बर्ष देखि क्यालिफोर्निया लाई कर्मक्षेत्र बनाई नेपाली कला, संस्कृती, पर्यटनको क्षेत्रमा नेपाल र नेपाली लाई विश्व सामु चिनाउनका लागि पर्यटन प्रवर्धन लाई संरक्षण गर्ने कार्यमा सक्रिय रही प्रवासी नेपालीहरूलाई जोडी कार्य गर्दै हुनु हुन्छ । जनकपुरधाम उपमहानगर पालिका वडा नं.१६ कपिलेश्वरका स्थायी बासीन्दा चौधरीलाई नेपाल सरकारको मन्त्री स्तरिय निर्णयले पर्यटन सद्भावना दूत नियुक्त गरेको उहाँका भाई लोकतान्त्रिक समाजवादी पार्टीका नेता संजय कुमार चौधरीले जानकारी दिनुभयो ।