ढल्केबर । मधेश प्रदेश सरकारले चालू आव २०७९/८० को पुस मसान्तसम्ममा कुल विनियोजित बजेटको ८ प्रतिशत मात्र खर्च गर्न सकेको छ । मधेश प्रदेश कोष तथा लेखा नियन्त्रण कार्यालयका प्रमुख राधेश्याम गिरीका अनुसार मधेश प्रदेश सरकारले छ महिनामा चालू तथा पुँजीगत खर्च गरेर तीन अर्ब ६६ करोड ९५ लाख रुपियाँ खर्च भएको छ । यसअनुसार बाँकी छ महिनामा ४३ अर्ब २१ करोड १३ लाख ८० हजार ३२९ रुपियाँ खर्च गर्न सक्नुपर्ने देखिएको छ ।चालू आर्थिक वर्षमा मधेश प्रदेशको कुल बजेट ४६ अर्ब ८८ करोड नौ लाख रुपियाँ छ, जसमध्ये चालूतर्फ २१ अर्ब ७६ करोड ६७ लाख ९५ हजार र पुँजीगततर्फ २५ अर्ब ८२ करोड २० लाख ८० हजार रुपियाँ छ । वित्तीय व्यवस्थापनतर्फ १६ करोड ६४ लाख ५६ हजार रुपियाँ बजेट विनियोजन गरेको छ । खर्च भएको रकममध्ये अधिकांश बजेट चालूतर्फको छ जसमा कर्मचारीको तलब, भत्ता तथा कार्यालय सञ्चालन समावेश हुन्छ । खास गरेर तीनै तहका निर्वाचनसहित विभिन्न कारणले यस पटक विकास खर्च कम भएको प्रदेश सरकारको दाबी छ । साभार : गोरखापत्र
                                    

2 वर्ष पहिले    161 Post Views