जनकपुरधाम । मधेस प्रदेशसभा बैठक आगामी जेठ २ गते बस्ने भएको छ । बैठक जेठ २ गतेका लागि आह्वान गरिएको प्रदेशसभाका सचिव रञ्जितकुमार यादवले जानकारी दिए । मधेस प्रदेशमा पछिल्लो प्रदेशसभा बैठक फागुन ४ गते बसेको थियो । सचिव यादवकाअनुसार उक्त बैठकमा चारवटा विधेयक पेस गर्ने सरकारको तयारी रहेको छ । भौतिक पूर्वाधार मन्त्रालयले बनाएको यातायातसम्बन्धी विधेयक प्रदेशसभामा पेस हुनेछ । अघिल्लो सरकारका भौतिक पूर्वाधार मन्त्री रामसरोज यादवको पालामा उक्त विधेयक तयार पारिएको थियो ।त्यस्तै बालबालिका संरक्षण र प्रदेश प्रशासनसम्बन्धी विधेयक पनि पेस हुने सम्भावित कार्यसूचीमा रहेको सचिव यादवले बताए । त्यस्तै बैठकमा समसमायिक विषय पनि समावेश गरिने तयारी रहेको उनले बताए । त्यस्तै प्रदेशमा बजेट अधिवेशन पनि सुरु हुँदैछ । बजेट अधिवेशनमा प्रि बजेट छलफल र नीति तथा कार्यक्रमबारे सांसदहरूले धारणा राख्ने कार्यसूची रहेको छ ।मधेसमा नयाँ सरकार गठन भएको चार महिना बित्न लागेको छ । सरकार गठन भएयता  आठवटा बैठक बसिएको छ । आठवटा बैठकमा सरकारले शुभकामना अदानप्रदान, सभामुख, उपसभामुख चयन र खेलकुद विकाससम्बन्धी विधेयक मात्रै पेस भएका छन् ।  मधेसमा वैशाख १० गतेको उपनिर्वाचन र राष्ट्रपति निर्वाचनका कारण प्रदेशसभा बैठक बस्न सकेको थिएन ।साभार : रातोपाटी
 

                                    

3 वर्ष पहिले    225 Post Views