सर्लाही, भदौ २१ गते । सर्लाही सदरमुकाम मलङ्गवामा १०८ फिट अग्लो राष्ट्रिय झन्डा फहराइएको छ । मधेश प्रदेश सरकारको सहयोगमा मलङ्गवा–सोनवर्षा नाकानजिक जिल्लामै पहिलो पटक १०८ फिट उचाइ भएको राष्ट्रिय झन्डा फहराइएको हो । प्रदेश सरकारका अर्थमन्त्री सञ्जयकुमार यादवको हातबाट मङ्गलबार झन्डोत्तोलन गरी उद्घाटन गरिएको मलङ्गवा नगरपालिकाले जनाएको छ । मन्त्री यादवले भारतीय नाकानजिक निर्माण गरिएको यो राष्ट्रिय झन्डाले राष्ट्रियतालाई थप मजबुत बनाउने विश्वास व्यक्त गर्नुभयो । सीमा नाका भएर आउजाउ गर्ने जो कोहीलाई पनि सीमा नजिकै राष्ट्रिय झन्डा फहराइरहेको देखेर राष्ट्रप्रतिको माया र प्रेमभाव जागृत हुने उहाँले बताउनुभयो । प्रदेश सरकारले उपलब्ध गराएको ३० लाख रुपियाँ बजेटबाट १०८ फिटको झन्डा निर्माण गरिएको मलङ्गवा नगरपालिकाका प्रमुख प्रशासकीय अधिकृत गेहनाथ गौतमले जानकारी दिनुभयो । उहाँका अनुसार झन्डा निर्माणस्थलका लागि मलङ्गवा नगरपालिका–४ निवासी खलिल हक अन्सारीले मलङ्गवा नगरपालिका–८ मा रहेको साढे १३ धुर जग्गा उपलब्ध गराउनुभएको छ । कार्यव्रmममा मधेश प्रदेश सभाका सदस्य कौशलकिशोर राय, नगर प्रमुख नागेन्द्रप्रसाद यादव, प्रमुख जिल्ला अधिकारी इन्द्रदेव यादवलगायतले मन्तव्य राख्नुभएको थियो । साभार : गोरखापत्र
                                    

2 वर्ष पहिले    226 Post Views