राहुल सिंह
जनकपुरधाम, कार्तिक २४ गते । सामाजिक सेवाप्रतिको प्रतिबद्धता र मानवीय भावनालाई व्यवहारमा उतार्दै समाजसेवी रमेश महतो सिंगरले छठ पर्वको अवसरमा जनकपुरधाम उपमहानगरपालिका वडा नं. १४ का १०० भन्दा बढी परिवारलाई छठ पूजाका लागि आवश्यक सामग्री वितरण गरेका छन्। महतोले आफ्नै निजी लगानीमा स्थानीय विपन्न तथा आर्थिक रूपमा कमजोर परिवारलाई साडी, साया, ब्लाउज र छठ पूजाका लागि ५ किलोका दरले गहुँ वितरण गरेका हुन्।
छठ पर्व आस्था, श्रद्धा, त्याग र सामाजिक सद्भावको प्रतीक भएकाले आर्थिक अभावका कारण कुनै पनि परिवार पर्वको खुसीबाट वञ्चित हुन नपरोस् भन्ने उद्देश्यले सहयोग कार्यक्रम सञ्चालन गरिएको हो। पर्वको समयमा विपन्न परिवारको घरमा समेत खुसी र उमंग ल्याउने उद्देश्यले गरिएको यस सहयोगले स्थानीयवासीमा सकारात्मक सन्देश प्रवाह गरेको छ। समाजसेवा केवल भाषण र प्रतिबद्धतामा सीमित नभई व्यवहारमै देखिनुपर्ने मान्यताका साथ महतोले व्यक्तिगत खर्चमा सहयोग गरेको स्थानीयहरूले बताएका छन्। सामाजिक तथा मानवीय कार्यमा निरन्तर सक्रिय रहँदै आएका महतोको यस पहललाई स्थानीयवासीले प्रशंसनीय र अनुकरणीय कार्यका रूपमा लिएका छन्।
समाजमा आर्थिक रूपमा कमजोर तथा विपन्न वर्गलाई सहयोग गर्नु सबैको साझा दायित्व भएको सन्देशसमेत यस कार्यले दिएको छ।