राहुल सिंह
जनकपुरधाम, कार्तिक २४ गते । जनकपुरधाम उपमहानगरपालिकाका वडा नं. १२, १५ र १६ लाई जोड्ने सडक कालोपत्रे गर्ने कार्य सम्पन्न भएको छ। शहरी विकास डिभिजन कार्यालयको पहल तथा जनकपुरधाम उपमहानगरपालिकाको संयुक्त सहकार्यमा उक्त सडक कालोपत्रे गरिएको हो।नगरको वडा नं. १२ स्थित कुवा, वडा नं. १५ को रामपुर र वडा नं. १६ को कपिलेश्वरलाई जोड्ने सडक कालोपत्रे सम्पन्न भएसँगै यस क्षेत्रका स्थानीयवासीलाई आवागमनमा सहजता हुने भएको छ। लामो समयदेखि सडकको समस्याका कारण आवतजावतमा कठिनाइ भोग्दै आएका स्थानीयवासीका लागि सडक कालोपत्रे भएपछि यात्रा थप सहज, सुरक्षित र सुविधाजनक हुने अपेक्षा गरिएको छ। विशेषगरी वर्षायाममा हिलो तथा अन्य समयमा धुलोका कारण स्थानीयले भोग्दै आएको समस्यासमेत कम हुने विश्वास गरिएको छ।जनकपुरधाम उपमहानगरपालिकाका नगर प्रमुख मनोज कुमार साहले शहरी विकास डिभिजन कार्यालय र उपमहानगरपालिकाको संयुक्त प्रयास तथा सहकार्यबाट सडक निर्माण कार्य सम्पन्न भएको जानकारी दिएका छन्।
उनले सडक पूर्वाधारको विकासले स्थानीय नागरिकको दैनिक जीवन सहज बनाउनुका साथै यस क्षेत्रको समग्र विकासमा समेत सकारात्मक योगदान पुर्‍याउने बताए। सडक कालोपत्रे सम्पन्न भएपछि वडा नं. १२, १५ र १६ का बासिन्दाबीचको आवागमन थप सहज हुने, स्थानीय व्यापारिक गतिविधि विस्तार हुने तथा शिक्षा, स्वास्थ्यलगायत अत्यावश्यक सेवामा पहुँच बढ्ने अपेक्षा गरिएको छ।स्थानीय पूर्वाधारको विकासमार्फत नागरिकलाई सहज, सुरक्षित र गुणस्तरीय सेवा उपलब्ध गराउने दिशामा सम्पन्न भएको यस सडक निर्माण कार्यलाई स्थानीयवासीले सकारात्मक रूपमा लिएका छन्।