जनकपुरधाम,फागुन २२ गते । केन्द्रमा नयाँ गठबन्धन बनेपछि प्रदेशमा आलोपालो नेतृत्व गर्ने लगभग सहमति भइसकेको छ । आलोपालो अनुसार पनि केहि प्रदेशमा नेतृत्व फेरिने सम्भावना छ ।
तर मधेश प्रदेशमा वर्तमान जनता समाजवादी पार्टी (जसपा) नेतृत्वकै सरकार रहिरहने देखिन्छ । अहिले जसपा संसदीय दलका नेता सरोजकुमार यादव मुख्यमन्त्री छन् । आलोपालोमा सहमति भएपनि पहिलो चरणमा वर्तमान मुख्यमन्त्रीले नै निरन्तरता पाउने जसपाका नेताहरु दावी गर्छन् ।
नेपाली काँग्रेससहितको सत्ता गठबन्धन भत्किएर एमालेसहितको नयाँ गठबन्धन बनेपछि जसपाले सरकारमा सहभागी हुन पहिलो शर्त राखेकाे छ । उनको शर्त मधेश सरकारको नेतृत्वलाई निरन्तरता दिनुपर्छ ।
 
जसपाबाट असन्तुष्ट जनमत पार्टीले भने सरकारमा अर्थात् नयाँ गठबन्धनमा सहभागी हुन मधेशको नेतृत्व फेरिनुपर्ने अडान राखेको छ । तर तत्काल जनमतलाई पाखा लगाइएको छ ।
 
हिजो अबेर साँझ नेकपा एमाले, नेकपा माओवादी केन्द्र, रास्वपा र जसपाबीच ८ बुँदे सहमति भयो, जुन सहमतिपत्रमा जनमत पार्टी सहभागी छैन । यसले पनि नयाँ गठबन्धनमा जनमतभन्दा जसपालाई प्राथमिकता दिएको छ ।
मधेश प्रदेशमा जनमतका १३ सांसद छन् । अहिले सरकारको नेतृत्व गरिरहेका जसपाका १९ सांसद छन् । सबभन्दा ठूलो दल नेकपा एमालेका २४ र माओवादीका ९ सांसद छन् । ९ सांसद रहेको लोसपा पनि सरकारमा जाने लगभग निश्चित जस्तै छ । सरकारमा जाने सम्भावना रहेको नेकपा एससँग ७ सांसद छन् ।
मधेश प्रदेशमा १०७ सांसद छन् । सरकार बनाउन सामान्य बहुमत अर्थात् ५४ सांसद आवश्यक पर्छ । यसरी हेर्दा जनमत पार्टी सरकारमा सहभागी नभएपनि साना दललाई मिलाएर एमाले, माओवादी र जसपाले सरकार बनाउन सक्छ ।
एमालेकै समर्थनमा जसपाका यादव मुख्यमन्त्री बनेका थिए । त्यतिबेला गठबन्धन भत्किएर एमाले आउट र काँग्रेस इन भएको बेला पनि मुख्यमन्त्री यादवलाई नै निरन्तरता दिइयो । अहिले फेरि नयाँ गठबन्धन बनेको अवस्थामा अर्थात् पहिलेको गठबन्धन पुर्नस्थापित भएपछि पनि यादव नै मुख्यमन्त्रीमा निरन्तरता पाउने देखिएको छ ।
मधेश सरकारबारे औपचारिक सहमति जुटाउन आज गठबन्धनको बैठक बस्दैछ । उक्त बैठकमा गठबन्धनमा सहभागी मधेशका सबै दलका संसदीय दलका नेता समेत सहभागी हुने बुझिएको छ । उनीहरु काठमाडौं पुगिसकेका छन् ।
एमाले मधेशका संसदीय दलका नेता सरोज कुमार यादवले प्रदेश सरकारबारे निर्णय गर्न अहिले गठबन्धनको बैठक बस्न लागेको बताए । उनले प्रदेशको नेतृत्व आलोपालो गर्ने कुरा छ तर तत्काल वर्तमान मुख्यमन्त्री यादव निरन्तरता पाउन सक्ने बताए ।
अब एमालेले नेतृत्व गर्न पाउनुपर्छ भन्ने तपाईको दावी छैन ?भन्ने नेपालप्रेसको जिज्ञासामा उनले भने, ‘एमाले सबभन्दा ठूलो दल हो । एमालेले नेतृत्व त पाउनैपर्छ । तर आलोपालो गर्ने सहमति हुनसक्छ ।’
साभार : नेपाल प्रेस
                                    

2 वर्ष पहिले    347 Post Views