जनकपुरधाम,असार २३ गते । । मधेश प्रदेशसभामा आगामी आर्थिक वर्ष २०८१/०८२ को बजेट पुनर्लेखनको अडान प्रतिपक्षी दलले राखेपछि बैठक असार २६ गतेसम्मका लागि स्थगित गरिएको छ ।आजको प्रदेशसभा बैठकमा बजेटमाथि छलफल गर्ने कार्यसूची थियो । तर सभामुख रामचन्द्र मण्डलले बैठक सुरु गरेलगत्तै प्रतिपक्षी दलहरू अबरोध गरेका थिए ।
बैठकमा जसपा नेपालका सांसद राजकुमार गुप्ताले सिस्टम ह्याक भएको कुरा सरकारले नै स्वीकार गरेकाले छानविन गर्न समिति गठन गर्नुपर्ने माग राखेका थिए ।त्यसपछि सभामुखले बैठक १० मिनेटका लागि स्थगित गरेर सहमती जुटाउन छलफल राखे । तर सहमती नजुट्दा उनले बैठक २६ गते विहान ११ बजेसम्मका लागि स्थगित गरेका हुन् ।
जसपा नेपालका सांसद गुप्ताले आजको छलफलमा सहमती नजुटेको र सत्ता पक्षले दुई दिनभित्र माग पुरा गर्ने जनाएपछि सभामुखले बैठक २६ गते विहान ११ बजेसम्मका लागि स्थगित गरेको जानकारी दिए ।उनले भने, ‘सिस्टम ह्याक गरेर बजेटमा गडबड गरिएको कुरा मुख्यमन्त्री र तत्कालीन अर्थमन्त्रीले स्वीकार्नु भएको छ । यदि त्यस्तो भएको छ भने छानविन गरी दोषीमाथि कारवाही गर्नुपर्छ । र, बजेट पुनर्लेखन गर्नुपर्छ ‌।’
साभार : नेपाल प्रेस