काठमाडौं, असार २६ : नेपाली कांग्रेसको केन्द्रीय अनुशासन समितिले ०७९ को स्थानीय, प्रदेश र प्रतिनिधिसभा निर्वाचनमा पार्टीको निर्देशनविरुद्ध गतिविधि गर्ने २६ जनालाई सचेत गराउने निर्णय गरेको छ।
पार्टीबाट आधिकारिक रुपमा उठेका र पार्टीले समर्थन गरेका गठबन्धनका उमेदवारविरुद्ध उमेदवारी दिने व्यक्ति, उनीहरूका प्रस्तावक तथा समर्थकलाई सचेत गराइएको हो।
समितिले उजुरीका आधारमा कैलालीका दुई, डोल्पाका १०, सल्यानका ११, दैलेख, खोटाङ र धनुषाका एक–एकजना गरी २६ जनालाई पार्टी हितविरुद्ध काम नगर्न सचेत गराउने निर्णय गरिएको विज्ञप्तिमा जनाइएको छ।
समितिले तीनै तहको निर्वाचनमा पार्टी तथा गठबन्धनका उमेदवारविरुद्ध उमेदवारी दिएका, तिनका प्रस्तावक तथा समर्थक बनेर निष्कासनमा परेका ८८ जनाको पुनरावेदन निवेदन केन्द्रीय कार्यसमितिको बैठकमा पेस गरिएको पनि समितिले जनाएको छ।
जस अनुसार कोसी प्रदेशबाट १७, मधेस प्रदेशबाट २३, वाग्मतीबाट चार, गण्डकीबाट तीन, लुम्बिनीबाट ३६, कर्णालीबाट चार र सुदूरपश्चिमबाट एकजना गरी जम्मा ८८ जनाको पुनरावेदन निवेदन परेको छ।
साभार : काठमाडौं प्रेस
1 दिन पहिले
8 Post Views
_1619862879.jpg)
