काठमाडौं, भदौ १७ : राष्ट्रिय सभाबाट संघीय निजामती विधेयक सर्वसम्मत रुपमा पारित भएको छ।
मंगलबार बसेको सभाको बैठकले विधेयक सर्वसम्मत रुपमा विधेयक पारित गरेको हो। विधेयक गत १५ असारमा प्रतिनिधिसभाबाट पारित भएर गएको थियो।
उक्त विधेयकमा सेवा निवृत्त भएका कर्मचारीले २ वर्षभन्दा अघि कुनै सरकारी नियुक्ति खान नमिल्ने व्यवस्था (कुलिङ अफ पिरियड) राख्न खोजिएको भए पनि प्रतिनिधि सभाबाट पारित हुने बेला गडबडी भएपछि राज्य व्यवस्था समितिको सभापतिबाट रामहरी खतिवडाले राजिनामा दिनुपरेको थियो।
राष्ट्रिय सभाले भने प्रतिनिधि सभामा कुलिङ अफ पिरियडसम्बन्धी भएको गडबडी लगायतका अन्य विषयमा संशोधनसहित पारित गरेको छ।
अब राष्ट्रिय सभाबाट पारित उक्त विधेयक सन्देशसहित प्रतिनिधि सभामा पठाइने छ। प्रतिनिधिसभाले राष्ट्रिय सभाबाट सन्देशसहित आएको विधेयकलाई पारित गरेपछि राष्ट्रपतिले प्रमाणीकरण हुनेछ । त्यसपछि मात्र यो ऐनका रुपमा लागू हुनेछ।
साभार : काठमाडौं प्रेस
_1782642472.jpeg)
