काठमाडौं । सत्तारुढ घटक नेपाली कांग्रेसले नागरिकता विधेयक प्रमाणीकरण गरी राष्ट्रपतिले संसद्को सम्मान र संविधानको संरक्षण गरेको जनाएको छ ।एक विज्ञप्ति जारी गर्दै कांग्रेसले विधेयक संविधानको धारा ११३ को उपधारा ४ अनुसार प्रमाणीकरण गर्नैपर्ने प्रावधान रहेको बताइएको छ । तर उक्त प्रावधान तत्कालीन राष्ट्रपतिले बेवास्ता गरेको कांग्रेसको टिप्पणी छ ।
विधेयक प्रमाणीकरण गरेर राष्ट्रपति पौडेलले संवैधानिक संकट टार्दै राष्ट्रिय एकताको रक्षा समेत गरेको कांग्रेसले जनाएको छ । 
कांग्रेस सूचना तथा सञ्चार विभाग प्रमुख मीन विश्वकर्माले जारी गरेको विज्ञप्तिमा भनिएको छ, ‘विधेयकमै संविधानको धारा ११३ (४) बमोजिम प्रमाणीकरण गर्न राष्ट्रपतिलाई सुझाई सबै प्रक्रिया पूरा गरी आएको विधेयक जस्ताको त्यस्तै प्रमाणीकरण गरिएको स्पष्ट विषयको आफू खुसी अर्थ लगाई जनतामा भ्रम फैलाउन खोजिएको कुराले संवैधानिक पथमा बाधा उत्पन्न गर्दछ ।’
साथै गणतन्त्र दिवसका अवसरमा रेशम चौधरीलाई आम माफी दिने निर्णयको पनि बचाउ गरेको छ ।
विज्ञप्तिमा भनिएको छ, ‘ज्यान मुद्दामा सजाय पाएका बालकृष्ण ढुंगेललाई एकदिन पनि सजाय नकाटी तत्कालीन राष्ट्रपतिले आममाफी दिँदा सन्चो मानेर बस्नेहरू आफू घटनामा उपस्थित नै नरहेको र केबल उत्पीडन र विभेदमा परेका थारु समुदायको अधिकारीको आवाजको नेतृत्व मात्र गरेका रेशम चौधरीलाई सबै दलको माग अनुसार मन्त्रिपरिषद्को सिफारिसमा बाँकी कैद मिनाहा गरी माफी दिँदा राष्ट्रपति संस्थामाथि नै आक्षेप लगाउँदै हल्ला मच्चाउनु कति उपयुक्त हो ?’


साभार : नेपाल प्रेस
                                    

1 वर्ष पहिले    115 Post Views