जनकपुरधाम, कार्तिक २९ गते । धनुषाको हंसपुर नगरपालिका–३, पश्चिमवारी टोलमा छठ पर्वको अवसर पारेर बृहत् सरसफाइ कार्यक्रम सम्पन्न गरिएको छ। रामजानकी मिथिला युवा कमिटीको आयोजनामा सञ्चालित उक्त सरसफाइ अभियानअन्तर्गत छठ पर्व मनाइने घाट, सडक, पोखरी तथा नालाको सरसफाइ गरिएको हो। लामो समयदेखि सरसफाइ हुन नसकेको उक्त क्षेत्रलाई युवाहरूको सक्रियतामा सफाइ गरिएपछि अहिले टोलको वातावरण स्वच्छ, सफा र सुन्दर देखिएको छ। छठ पर्वमा व्रतालु तथा श्रद्धालु भक्तजनहरूको ठूलो उपस्थिति हुने भएकाले पर्वलाई स्वच्छ, व्यवस्थित र सौहार्दपूर्ण वातावरणमा सम्पन्न गराउने उद्देश्यले सरसफाइ कार्यक्रम आयोजना गरिएको आयोजकले जनाएको छ।
सरसफाइ कार्यक्रममा हंसपुर नगरपालिका वडा नं. ३ का वडाध्यक्ष उदय सिंह, समाजसेवी दुर्गेश्वर सिंह, शिवंकर सिंह, नाटककार जयप्रकाश सिंह, पूर्वप्रधानाध्यापक राघवेन्द्र प्रसाद सिंह, स्थानीय गणेश सिंह, दरोगा प्रसाद सिंह, नवीन सिंह, कमलेश सिंह, धिरेन्द्र सिंह, चुनचुन सिंह राहुल प्रताप सिंह, राहुल सिंह, सुजित सिंह, चञ्चल सिंह, अविनाश सिंह, राजन सिंह, विवेक सिंहलगायत स्थानीय बुद्धिजीवी, समाजसेवी तथा युवाहरूको सहभागिता रहेको थियो। स्थानीय स्तरमा युवाहरूको सक्रियतामा सञ्चालन गरिएको यस प्रकारको सरसफाइ अभियानले सामाजिक एकता, सामूहिक जिम्मेवारी र वातावरण संरक्षणप्रति जनचेतना अभिवृद्धि गर्न महत्वपूर्ण योगदान पुर्याउने विश्वास गरिएको छ। साथै, पर्वका बेला मात्र नभई अन्य समयमा पनि आफ्नो गाउँटोल तथा सार्वजनिक स्थलको नियमित सरसफाइमा ध्यान दिनुपर्ने आवश्यकता सहभागीहरूले औँल्याएका छन्।
